(ភ្នំពេញ) ៖ ទាក់ទិននឹងខ្លឹមសារលិខិតជូនដំណឹងរបស់លោកមេធាវី នៅ រំដួល ដែលជាមេធាវីការពារសិទ្ធរបស់ជនជាតិវៀតណាមលោក Let Quang Trang ហៅ អ៊ុក ចាង ក្នុងលិខិតមួយផ្ញើមកជាច្រើនអង្គភាព ក្នុងក្នុងនោះក៏មានសារព័ត៌មាន «ណាញធីវី» និង «វីអូខេ» ដោយបានដាក់កំហិតគំរាមប្ដឹងអ្នកសារព័ត៌មានប្រសិនបើមិនលុបព័ត៌មានទាក់ទង និងដាក់កំហិតឲ្យសុំទោសជាសាធារណៈ ក្នុងរយៈពេល៧ថ្ងៃ ពាក់ព័ន្ធការផ្សព្វផ្សាយព័ត៌មានអំពីកូនចៅរបស់លោក អ៊ុក ចាង ដែលបាននាំគ្នាមកកាប់លើបុរសម្នាក់ឈ្មោះ ង្វៀន វ៉ាន់ បណ្ដាលឲ្យរងរបួសយ៉ាងធ្ងន់ធ្ងរជាទីបំផុត ស្ថិតនៅចំណុចផ្ទះលេខ 03Y04 ភូមិចេក ឃុំសំរោង ស្រុកចន្ទ្រា ខេត្តស្វាយរៀង។
ការគំរាមប្តឹងអ្នកសារព័ត៌មាននេះ យោងតាមលិខិតមួយ ដែលអង្គភាពសារព័ត៌មាន «ណាញធីវី» និង «វីអូខេ» ទទួលបាននៅថ្ងៃទី២៦ ខែមិថុនា ឆ្នាំ២០២៣ ដោយបានភ្ជាប់នូវឯកសារជូនដំណឹងមានចេតនាគំរាមឲ្យឲ្យលុបព័ត៌មាន និងដាក់កំហិតឲ្យសុំទោសជាសាធារណៈ ធ្វើឲ្យប៉ះពាល់ដល់សេរីភាពសារព័ត៌មានយ៉ាងខ្លាំង។
ទាក់ទងនឹងករណីនេះផងដែរ អង្គភាពព័ត៌មានយើង ទទួលបានព័ត៌មានពីអង្គភាពសារព័ត៌មាន «ណាញធីវី» និង «វីអូខេ» ដែលជាសមាជិកនៃសមាគមអ្នកសារព័ត៌មានយុវជន បានធ្វើការឆ្លើយតបទៅលោកមេធាវី នៅ រំដួល ដែលជាមេធាវីការពារសិទ្ធរបស់ជនជាតិវៀតណាម អ៊ុក ចាង ម្ចាស់កាស៊ីណូ Galaxy 888 នៅខ្លឹមសារផ្លូវច្បាប់មួយចំនួនថា៖
១.សូមឲ្យលោកមេធាវី នៅ រំដួល សូមសិក្សារច្បាប់ស្ដីពីរបបសារព័ត៌មានឲ្យបានច្បាស់លាស់ អង្គភាពសារព័ត៌មាន «ណាញធីវី» និង «វីអូខេ» បានផ្សព្វផ្សាយដោយមានប្រភពច្បាស់លាស់ ហើយមានឯកសារពាក់ព័ន្ធមួយចំនួន និងផ្សាយព័ត៌មានតាមប្រភពសមត្ថកិច្ចចុះបង្ក្រាបជាក់ស្ដែង ម្យ៉ាងទៀតសូមលោកយល់ថា រាល់ព័ត៌មានដែលពិតប្រាកដបើផ្សាយហើយ គឺមិនអាចលុបបានជាដាច់ខាត ប្រសិនបើលោកយល់ថា មិនត្រឹមត្រូវសូមបកស្រាយឲ្យបានច្បាស់លាស់ មានលិខិតជូនដល់សាម៉ីអង្គភាពឲ្យបានច្បាស់លាស់ ដើម្បីលាងភាពស្អាតស្អំរបស់ខ្លួន ក្នុងរយៈពេល១សប្ដាហ៍ប្រសិនបើមិនផ្សាយបំភ្លឺទេ អាចដាក់ពាក្យបណ្ដឹងតាមផ្លូវច្បាប់បាន។
២.ពាក់ព័ន្ធនឹងកម្មវត្ថុរបស់លោកមេធាវី នៅ រំដួល លោកបានប្រើសិទ្ធជាមេធាវីហួសហេតុពេក ដោយបានដាក់បទបញ្ជាឲ្យលុប និងសុំទោសជាសាធារណៈ ពាក់ព័ន្ធនឹងខ្លឹមសារព័ត៌មាន ដែលបានចុះផ្សាយកូនចៅរបស់លោក អ៊ុក ចាង ដែលបម្រើការងារស្ថិតនៅកាស៊ីណូ Galaxy 888 វាយលើជនរងគ្រោះ ង្វៀន វ៉ាន់ គឺលោកមេធាវីប្រើសិទ្ធធំជាងក្រសួងព័ត៌មានទៅទៀត អង្គភាពសារព័ត៌មាន «ណាញធីវី» និង «វីអូខេ» សូមណែនាំលោកមេធាវីថា គឺផ្សាយយោងតាមផ្លូវច្បាប់ ដោយមិនលំអៀងខាងណាទេ អង្គភាពសារព័ត៌មាន «ណាញធីវី» និង «វីអូខេ» ផ្សព្វផ្សាយ ដោយយោងតាមលក្ខន្ដិកៈ និងច្បាប់ ដែលបានតម្កល់ក្នុងក្រសួងព័ត៌មាន។
៣.ពាក់ព័ន្ធនឹងការផ្សាយអត្ថបទខាងលើនេះ អង្គភាពសារព័ត៌មាន «ណាញធីវី និង «វីអូខេ» សូមជម្រាបជូនលោកមេធាវីថា គឺផ្សាយមានប្រភពច្បាស់ការណ៍ រាល់ខ្លីបវីដេអូ បានបង្ហាញយ៉ាងច្បាស់លាស់ថា ជនបង្កទាំង១៤ គឺជាបុគ្គលិករបស់កាស៊ីណូ Galaxy 888 ពិតប្រាកដមែន ជាពិសេសកំណត់ហេតុរបស់សមត្ថកិច្ច គឺបានបញ្ជាក់យ៉ាងច្បាស់លាស់ថា បុគ្គលទាំងនោះ បានវាយលើជនរងគ្រោះពិតប្រាកដមែន មិនមែនដូចលោកមេធាវីលើកឡើងបែបប្រឌិតនោះឡើយ។ ពាក់ព័ន្ធនឹងការផ្សាយនេះ អង្គភាពព័ត៌មាន «ណាញធីវី» និង «វីអូខេ» ផ្សព្វផ្សាយតាមព័ត៌មានដោយមិនបញ្ចេញពាក្យពេចន៍ណាដែលមានចរិតលក្ខណៈបរិហាកេរ្ដិ៍ និងញុះញង់ឲ្យខូចខាតដល់ភាគីណាម្នាក់ឡើយ គោលបំណងតែមួយគត់ គឺផ្សព្វផ្សាយជូនសាធារណៈជនតាមក្រមសីលធម៌ និងវិជ្ជាជីវៈសារព័ត៌មាន។
៤.ពាក់ព័ន្ធអង្គភាពព័ត៌មាន គឺខិតខំប្រឹងប្រែងផ្សព្វផ្សាយព័ត៌មានជូនសង្គមជាតិ ម្យ៉ាងទៀតក្រោយជំនួបសំណេះសំណាលរបស់សម្ដេចតេជោ ហ៊ុន សែន នាយករដ្ឋមន្ដ្រី និងអ្នកសារព័ត៌មាន កាលពីថ្ងៃទី១៤ ខែមករា ឆ្នាំ២០២៣កន្លងទៅ ដោយយោងតាមប្រសាសន៍ថា អ្នកសារព័ត៌មានត្រូវបន្ដយុទ្ធនាការប្រយុទ្ធភាពអសកម្ម ភាពមិនត្រឹមត្រូវ និងអំពើរពុករលួយ និងដើម្បីប្រយុទ្ធប្រឆាំងនឹងព័ត៌មានក្លែងក្លាយ ត្រូវយកព័ត៌មានពិតមកបង្ក្រាប ដោយធ្វើឲ្យបានលឿនរហ័ស ដើម្បីបន្សាបព័ត៌មានក្លែងក្លាយ ប៉ុន្ដែលោកមេធាវី បែរដាក់កំហិតដោយឲ្យលុបព័ត៌មានពិត ធ្វើឲ្យប៉ះពាល់ដល់សេរីភាពអ្នកសារព័ត៌មានខ្លាំងក្លាជាទីបំផុត។
៥.ពាក់ព័ន្ធករណីនេះ ការផ្សព្វផ្សាយដោយយោងលើការសម្ភាសតាមប្រភពព័ត៌មានពីទីតាំងកើតហេតុ ដែលមានសហការីអង្គភាពសារព័ត៌មាន «ណាញធីវី និង «វីអូខេ» បានចុះដល់ទីតាំងកើតហេតុជាក់ស្ដែង ប៉ុន្ដែលោកមេធាវីឆ្លើយថា មិនពិត គឺស្រេចតែលើការនិយាយរបស់លោកមេធាវីប៉ុណ្ណោះ ព្រោះលោកក៏បានបញ្ជាក់ថា កូនក្ដីរបស់លោកក៏បានទិញកាស៊ីណូមួយនេះផងដែរ ក្នុងនាមអង្គភាព «ណាញធីវី» និង «វីអូខេ» ជាសមាជិករបស់សមាគមសារព័ត៌មានយុវជន ដែលបានចងសម្ព័ន្ធជាសម្ព័ន្ធសមាគមសារព័ត៌មានកម្ពុជា ដែលមាន១៤សមាគមធំៗនៅក្នុងប្រទេសកម្ពុជា និងស្នើសុំអង្គភាពចំណុះមានទូរទស្សន៍ កាសែត និងគេហទំព័រ ដើម្បីបន្ដបេសកម្មស្រាវជ្រាវប្រភពបន្ដទៀតពីសមត្ថកិច្ច និងនីតិវិធីចំណាត់ការផ្លូវច្បាប់បែបណាបន្ដទៀត ដើម្បីផ្សព្វផ្សាយជូនរាជរដ្ឋាភិបាលតាមវិជ្ជាជីវៈសារព័ត៌មាន។
៦.ករណីលោកមេធាវី នៅ រំដួល បានដាក់កំហិតថា ប្រសិនបើមិនលុប និងធ្វើការសុំទោសជាសារធារណៈក្នុងរយៈពេល៧ថ្ងៃ ខ្លួននឹងដាក់ពាក្យបណ្ដឹង។ ក្នុងនាមអង្គភាពសារព័ត៌មាន «ណាញធីវី» និង «វីអូខេ» ដែលមានអាជ្ញាប័ណ្ណត្រឹមត្រូវទទួលស្គាល់ពីក្រសួងព័ត៌មាន និងក្រោមការដឹកនាំរបស់រាជរដ្ឋាភិបាល គឺមានសិទ្ធក្នុងការប្ដឹងតបតតាមផ្លូវច្បាប់ដូចគ្នា គឺមិនមែនតែលោកមេធាវី នៅ រំដួល និងកូនក្ដីលោកមេធាវីនោះទេ។ អង្គភាពសារព័ត៌មាន «ណាញធីវី» និង «វីអូខេ» សូមណែនាំលោកមេធាវី នៅ រំដួល ថា លោកគួរតែបំភ្លឺលាងភាពស្អាតស្អំរបស់ជនជាតិវៀតណាម អ៊ុក ចាង ដើម្បីបង្ហាញភាពត្រឹមត្រូវរបស់ខ្លួន ជាជាងប្រើសិទ្ធរបស់លោកមេធាវីលើសក្រសួងព័ត៌មាន តាមរូបភាពជូនដំណឹងមានលក្ខណៈប្រើសិទ្ធគំរាមកំហែងអ្នកសារព័ត៌មានពាក់ព័ន្ធនឹងផ្លូវច្បាប់បែបនេះទេ។
ដើម្បីបង្ហាញភាពត្រឹមត្រូវ ដោយឈលើគោលការណ៍ផ្លូវច្បាប់ លោកគួរបំភ្លឺឲ្យបានត្រឹមត្រូវអង្គភាពសារព័ត៌មាន «ណាញធីវី» និង «វីអូខេ» មិនមានសិទ្ធផ្សាយចោទប្រកាន់បុគ្គលណាម្នាក់នោះទេ ដូច្នេះសូមលោកមេធាវី នៅ រំដួល និងសាធារណជនសូមជ្រាបជាព័ត៌មាន។
ទោះជាយ៉ាងណាអង្គភាពសារព័ត៌មានទាំង២ សូមសំណូមពរដល់ឯកឧត្តម លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជាមេត្តាមានវិធានការណ៍លើលោក នៅ រំដួល ដែលជាមេធាវី សូមមេត្តាកុំប្រើសិទ្ធហួសព្រំដែន ខណៈបញ្ជា និងគំរាមប្តឹងអ្នកសារព័ត៌មាន ដែលនេះជាចេតនា បំបិទសិទ្ធសេរីភាពអ្នកសារព័ត៌មាន ក្នុងការចុះផ្សាយនូវព័ត៌មានជូនសង្គមជាតិជាដើម ហើយអង្គភាពសារព័ត៌មានយើងខ្ញុំ នៅតែចាំមើលថា តើរឿងនេះនឹងទៅជាយ៉ាងណា ?៕
